الصفحة دي إيه؟
- دي المذاكرة بتاعتك كلها في مكان واحد، مادة مادة.
- كل مادة فيها المحاضرات والسكاشن بالترتيب، أسبوع ورا أسبوع من أول الترم.
- تدوس على أي محاضرة تدخل جواها، وتلاقي فوق 3 حاجات: ملفات الكلية، وريكوردات الكلية، وتبييضات.
- ملفات الكلية هي اللي نزلها الدكتور زي ما هي، والريكوردات تسمعها من الصفحة على طول من غير ما تنزّل حاجة.
الفرقة والمواد
- أول ما تدخل بتختار فرقتك، فتلاقي مواد الترم بتاعها كلها قدامك.
- لو إنت شايل مادة من فرقة قبل كده، أو مسجل مواد من كذا فرقة، اختار «فرق أخرى» وعلّم على موادك بنفسك بعلامة +.
- مثال: إنت في تانية ومعاك مادة من أولى. اختار «فرق أخرى»، وعلّم على مواد تانية والمادة اللي من أولى.
- تقدر تغيّر فرقتك أو موادك في أي وقت: افتح البروفايل (الدايرة اللي فوق على الشمال)، ودوس «تعديل الفرقة / المواد».
- لما الترم التاني يبدأ، موادك هتتغير لوحدها لمواد الترم التاني.
التبييض بيتعمل إزاي؟
- بنبدأ من ملف الدكتور نفسه، السلايدات أو الـ PDF اللي نزل.
- بنكتب كل سلايد بشرح عربي بسيط، والمصطلحات تفضل إنجليزي زي ما هتتسأل فيها.
- لو المحاضرة ليها ريكورد، بنسمعه ونضيف الكلام اللي الدكتور ركّز عليه.
- لو مفيش ملف ونزل ريكورد بس، التبييض بيتكتب من الريكورد.
- النقط اللي جت في امتحانات قبل كده عليها ⭐، فخلي بالك منها.
- مش بنزود حاجة من برة. اللي مش في الملف ولا في الريكورد مش هتلاقيه في التبييض.
- لو حتة في السلايد ناقصة أو الصوت مش واضح، هتلاقي مكتوب إنها ناقصة. ارجع فيها للدكتور أو للكتاب.
اختبر نفسك
- جوه كل محاضرة فيه 3 امتحانات قصيرة، أسئلتها من المحاضرة نفسها بس.
- تختار الإجابة، فتعرف على طول هي صح ولا غلط، والإجابة الصح إيه.
- في الآخر بتطلعلك درجتك، وتقدر تراجع الأسئلة اللي غلطت فيها.
- كل امتحان يتعاد تاني بعد 12 ساعة من آخر مرة حليته.
- الـ 12 ساعة دي مقصودة. بعدها بتكون نسيت ترتيب الإجابات، فالدرجة اللي هتجيبها تبقى درجتك بجد مش حفظ.
- أحسن طريقة: ذاكر المحاضرة، حل امتحان، راجع اللي غلطت فيه، وتاني يوم حل امتحان تاني.
يعني إيه داتا قديمة؟
- كل مادة المفروض تاخد محاضرة كل أسبوع.
- لو الأسبوع عدّى وملفات دفعتك لسه ما نزلتش، بنحطلك ملفات الدفعة اللي قبلك عشان ما تقفش.
- أول ما الجديد ينزل، القديم بيتشال والجديد ياخد مكانه لوحده.
- المنهج ممكن يتغير شوية من سنة للتانية، فالقديم للاستعداد بس، والمرجع الأساسي هو اللي هيدّيهولك دكتورك.
تذاكر بيها إزاي؟
- ذاكر المحاضرة يوم ما تتشرح أو تاني يوم، ما تسيبهاش تتراكم.
- افتح التبييض واقراه بهدوء. لو في حتة مش فاهمها، ارجع لملف الدكتور أو اسمع الريكورد عندها.
- لما تخلص دوس «ذاكرتها» جوه المحاضرة، فتلاقي علامة صح جنبها من برة.
- علاماتك ودرجاتك محفوظة على رقم تليفونك، ومحدش غيرك بيشوفها.
- لو غيّرت الموبايل، ادخل بنفس الرقم وهتلاقي كل حاجة زي ما هي.
تحطها على الموبايل
- آيفون: افتح اللينك من Safari، دوس زرار المشاركة، واختار «Add to Home Screen».
- أندرويد: افتحه من Chrome، ودوس «ثبّت الصفحة على الشاشة» أو من التلت نقط اختار «Add to Home screen».
- هتظهرلك أيقونة A+ على الشاشة، وتفتحها زي أي أبلكيشن.
بالتوفيق، ولو في حاجة مش واضحة ابعتلنا.
